由數碼港送藥去長洲,無人機飛過海,另一邊有人接貨。香港已經試過呢條路線,由物流公司同醫管局合作,將藥物送去長洲聖約翰醫院。不過,假如附近同一時間有另一部無人機做巡查,仲有救援隊臨時要用嗰段空域,幾邊嘅操作員點知邊個會先起飛、邊個要改道?
11 月 17 日,香港生產力促進局開咗個無人機任務管理展示中心,展示「低空經濟監管沙盒 X」入面,共用平台試到邊一步。政府喺活動上話,已經有超過 20 個部門參與。做法係有部門想出機,可以先交低要做咩,再由中心幫手配對合適嘅設備同服務商,幾個部門就可以共用同一批資源。
飛到一半,收貨嗰邊突然落唔到機
假設朝早十點有一轉貨要送。未起飛之前,負責安排嗰個人要知兩邊起降點用唔用到,附近又有冇其他飛行任務。飛到一半,如果收貨嗰邊臨時落唔到機,操作員就要決定等一等、飛返轉頭,定係取消嗰一轉。地下等緊收貨嗰個,都要有人話佢知仲使唔使等。
共用平台仲有另一個用途。生產力局提到,如果一部無人機飛一轉影低一批畫面,有權睇嘅部門可以各自攞嚟用。一邊睇設施有冇損壞,另一邊睇附近環境有冇變。咁樣有機會慳返一轉,但要睇第一次影嗰陣,個角度同清晰度夠唔夠兩邊用。
對物流公司嚟講,最實際嗰條問題係:「我應承咗客人十點半送到,今日飛唔到,件貨點去長洲?」改搭船趕唔趕得切?碼頭有冇人接?邊個打俾客人講幾點先到?呢幾樣有晒答案,先知一程無人機送貨可唔可以排入每日張送貨表。
資料來源 香港生產力促進局|無人機任務管理展示中心、香港政府新聞網|無人機送藥試驗
作者 SRAM
