「星期五朝早有冇位?八點半唔得嘅話,九點呢?」
車房接到呢通電話,聽落同平時冇乜分別。不過今次打嚟嘅係 AI。車主交低咗要求就去做自己嘢,到日曆彈出預約通知,先知道最後訂咗邊間。
Google 喺 11 月 17 日公布擴大 Gemini 嘅「Tasks」功能。Google 副總裁 Josh Woodward 話,佢試過叫 Gemini 幫手搵兩間附近嘅車行,問吓星期五朝早有冇位做保養。Gemini 分別打去兩間車行,一開口就講明自己係 AI,約好之後仲將個時間加埋落佢嘅 Google 日曆。Tasks 今輪喺六個市場免費推出,香港未有份。幫人打電話呢類進階功能就由美國率先推出。
以前問一間就算,而家可以順手問多兩間
自己打電話格價,問完第一間,覺得價錢合理、時間又啱,好多人就直接訂。再打去第二間,又要由頭講一次揸咩車、想做咩、邊日得閒。如果將幾通電話交晒俾 AI,客人可能連你個網站都未開過,就已經拎住幾間舖頭嘅答覆嚟揀。
諗吓一間樓上美容店。Google 地圖寫住夜晚九點閂門,但最尾嗰節療程七點半就要開始。有人叫 AI 幫手問「我八點放工先過到嚟,得唔得?」店員一句「得呀,我哋開到九點」,可能只係講緊可以上嚟買嘢,客人就以為仲約到做 facial。再問埋「首次優惠包唔包皮膚分析」,如果電話同 WhatsApp 俾咗兩個答案,一樣會搞亂。
對商戶嚟講,有啲嘢今日已經可以睇返。Google 地圖寫到幾點、官網點樣寫收費、WhatsApp 又叫人點預約,三邊講嘅係咪同一回事?如果要睇相先報到價,就寫清楚要影邊度。客人叫 AI 幫手,只係想少打幾通電話。等佢收到答覆嗰陣,可能已經準備揀一間落訂。
資料來源 Google|Gemini Tasks 更新、The Verge|Gemini Tasks 推出詳情
作者 SRAM
